بطل جريح" الحقيقة في سراديب طهران
فهيم سيداروس
من ساعات، الدنيا أتقلبت في طهران بسبب تسريب خرج من التلفزيون الرسمي الإيراني.
الحكاية بدأت بخبر مقتضب بيقول إن المرشد الأعلى الجديد، مجتبى خامنئي، اتصاب إصابة خطيرة في العمليات العسكرية الأخيرة.
الخبر خرج متأخر، ومن غير تفاصيل، وده اللي خلى الأسئلة تفتح "مغارة" من الشكوك.
الإيرانيين وصفوا مجتبى بلقب "جانباز"، وده لقب له قدسية عندهم لأنه بيطلق على "مصابي المواجهات".
الرسالة الإيرانية واضحة: "المرشد اتصاب إصابة بالغة، حالته حرجة، بس لسه ماسك الخيوط وبيدير المواجهة".
كأنهم عايزين يقولوا إنه "بطل جريح" مش مجرد قائد قاعد في الملاجئ.
على الناحية التانية، التقارير الغربية والإسرائيلية عندها رأي تاني خالص.
هما شايفين إن قصة "الإصابة" دي مجرد "ستارة" بيغطوا بيها على حقيقة أضخم، وهي إن مجتبى أتصفى فعلاً في نفس الضربة التي طيرت والده "علي خامنئي" وأفراد من أسرته.
الدليل إيه؟ إن مجتبى من ساعة ما بقى "مرشد" مظهرش للناس بوشه، ولا حتى سجل رسالة صوتية واحدة! آخر ظهور له كان قبل الضربة اللي صفت والده.. ومن بعدها، اختفى تماماً.
مركز أبحاث تركي (Russen) دخل على الخط برواية أخطر؛ بيقول إن مجتبى قُتل في غارة إسرائيلية، وإيران بتلعب "لعبة تكتيكية".
بيعلنوا إنه لسه موجود عشان يشتتوا أمريكا وإسرائيل، وفي الحقيقة فيه قائد جديد تم اختياره في "السر" بيدير الأمور من ورا الستار، عشان ميبقاش هدف سهل للتصفية قبل ما يثبت رجله.
صحيفة وول ستريت جورنال قالت إن الضربات اللي استهدفت طهران في أول أيام مجتبى كانت "كارت معايدة" دامي من إسرائيل، بتقول فيه: "مفيش قائد جديد بعيد عن إيدينا".
أما في واشنطن، فـ دونالد ترامب كان بيأمل إن غياب "خامنئي الأب" يفتح الباب لشخصيات هادية تحب الكلام، بس اللي حصل إن "الابن" (لو لسه حي) معروف إنه أكثر تشدداً وعايز ينتقم، والنظام في طهران لسه متماسك ومفيش أي علامة لتمرد داخلي.
إيران بتصدر للعالم إن مرشدها "مصاب"، والغرب بيقول إنه "مدفون".. والحقيقة لسه مستخبية في سراديب طهران، والكل مستني "ظهور علني" واحد ينهي الجدل ده كله.
تعليقات
إرسال تعليق