تعرف ايه عن الإنسان الأصيل
د. هالة مستكلي
الإنسان الأصيل مش محتاج يثبت نفسه بكلام ولا مظاهر.. أصله يبان في حضوره، في ضحكته اللي تطمّن القلب، وفي غيابه اللي يسيب فراغ كبير.
الأصيل مش بيتلوّن ولا بيتغيّر مع الظروف، ده معدن نضيف ثابت، مهما الدنيا لفت ودوّرت حواليه. الأصول ما بتتشراش بفلوس ولا بتتجمّل بكلام، الأصول دي تربية.. وقلوب اتعلمت تحافظ على العِشرة وتقدّرها.
الأصيل تلاقيه جنبك في وقت الشدة من غير ما تطلب، وتلاقيه بيشاركك فرحك من قلبه من غير غيرة ولا حسابات. وجوده سند، وبعده برضه سند.. لأنه سايب جوه روحك ونس وراحة.
والأجمل لما يكون الأصيل ده مش بس صاحب أو قريب.. لكن يكون حبيب
ساعتها حضوره يبقى أمان، وكلامه يبقى بلسم، وعيونه تبقى وطن.
في الآخر، الأصيل مش كتير.. بس وجوده في حياتك كفاية يغيّر طعم الدنيا كلها.
تعليقات
إرسال تعليق